V. Malsawmtluanga chuan zirlai hlawhtlinna chang tharte leh an chhungte a lawmpui thu sawiin, an hma lam hun atan duhsakna a hlan a. Zirlai ti ṭhate chawimawina hun hmanna hmun Serkawn Sikulpui chu Zosapte'n an din leh mi hlawhtling tak tak lo zir chhuahna a nih avangin leh amah ngei pawhin a lo zir ve tawhna hmun a nih avangin a ngaihlu hle tih sawiin, Serkawn pa a nih ang leh Bialtu MLA a nih angin District Education Office lam nen ṭang kawpa model sikula din chhuak tura hma lak a tum thu a sawi.

Lunglei North MLA chuan, Pathianin kan tana malsawmna a dah tawng baw turin thawh rim a ngai, a ti a. Zirlaite chu vawiina an hlawhtlinna hi pen sang khat pen tura an pen khatna chauh a ni tih hre tur leh an zirlaiah leh an thil tihna kawng tinrengah Pathiana innghat tlat tura chahin, Pathiana an innghah phawt chuan Pathianin an duhaisam aia ṭha a pe ang tih ring ngam turin a chah.

He hun hi Serkawn Branch YMA Education & Library Committee Chairman  F. Lalhmangaihthanga'n kaihruaiin, Serkawn khaw chhunga zirlai ti ṭha mi 23 hnenah chawimawina thuziak leh thilpek hlan niin, Branch YMA President Pu C. Lalmuanzova'n zirlaite fuihna thu a sawi bawk.

Serkawn khaw chhunga board exam-a zirlai hlawhtlinna chang, class-XII chin hnuai lamte chu YMA Day, June ni 15, 2024 khan chawimawina hlan an lo ni tawh a. Vawiin hian bachelor degree china zirlai hlawhtlinna chang mi 23 (mipa 7 leh hmeichhia 16) hnenah chawimawina hi hlan a ni a. An zinga mi 7 (mipa 1 leh hmeichhia 6) chu university level-a top rank holder an ni.